“నిడదవోలు చరిత్ర” గేయం ఆవిష్కరణ – పురంధేశ్వరి చేతుల మీదుగా ఘన కార్యక్రమం

ఉండ్రాజవరం మండలం పాలంగి గ్రామానికి చెందిన రిటైర్డ్ ఆంగ్ల భాష అధ్యాపకులు, టీవీ–సినీ క్యారెక్టర్ ఆర్టిస్ట్, గేయ రచయిత కోట రామ ప్రసాద్ రాసిన “నాటి నిరవద్య పురమే – నేటి నిడదవోలు” గేయం నిడదవోలు చరిత్రను సమగ్రంగా, భావగర్భితంగా ఆవిష్కరించిన అద్భుత కృతిగా నిలిచింది. ఈ గేయాన్ని రాజమహేంద్రవరం పార్లమెంట్ సభ్యులు, మాజీ కేంద్ర మంత్రిణి శ్రీమతి దగ్గుబాటి పురంధేశ్వరి ఎంతో ప్రశంసించారు.

నిడదవోలు పురపాలక సంఘం వజ్రోత్సవ వేడుకలు

నిడదవోలు పురపాలక సంఘం ఏర్పడి 60 సంవత్సరాలు పూర్తయిన సందర్భంగా నవంబర్ 26, 27, 28 తేదీల్లో వజ్రోత్సవ కార్యక్రమాలు వైభవంగా నిర్వహించబడ్డాయి. ఈ వేడుకల ముగింపు సభ శుక్రవారం రాత్రి “ఐ లవ్ నిడదవోలు పార్క్” వద్ద రాష్ట్ర పర్యాటక, సాంస్కృతిక, సినిమాటోగ్రఫీ శాఖామాత్యులు కందుల దుర్గేష్ ఆధ్వర్యంలో జరిగింది.

ఈ కార్యక్రమానికి ముఖ్య అతిథిగా శ్రీమతి దగ్గుబాటి పురంధేశ్వరి హాజరై కార్యక్రమాన్ని అలంకరించారు. సభకు నిడదవోలు పురపాలక సంఘం అధ్యక్షుడు భూపతి ఆదినారాయణ అధ్యక్షత వహించారు.

గేయ రచయితకు ఘన సత్కారం

కార్యక్రమంలో మంత్రి కందుల దుర్గేష్, గేయ రచయిత కోట రామ ప్రసాద్‌ను పురంధేశ్వరి గారికి పరిచయం చేస్తూ, ఆయన గతంలో అంతర్జాతీయ యోగా దినోత్సవం సందర్భంగా కూడా అద్భుతమైన గేయాన్ని రచించారని గుర్తు చేశారు. ఆ గేయాన్ని కూడా పురంధేశ్వరి గారే ఆవిష్కరించిన విషయం ఈ సందర్భంగా పునశ్చరణ అయ్యింది.

తరువాత పురంధేశ్వరి గారు “నిడదవోలు చరిత్ర” గేయాన్ని అధికారికంగా ఆవిష్కరించారు. వేదికపై ఉన్న ప్రముఖులకు గేయ ప్రతులను కోట రామ ప్రసాద్ అందజేశారు. వెంటనే గేయాన్ని సభలో మైక్ ద్వారా వినిపించగా, హాజరైన ప్రతి ఒక్కరూ ఆస్వాదించారు.

ఈ సందర్భంగా రాష్ట్ర మంత్రి కందుల దుర్గేష్, పురంధేశ్వరి గారు, మున్సిపల్ చైర్మన్ భూపతి ఆదినారాయణ, వైస్ చైర్మన్ షేక్ వజీరుద్దీన్, మున్సిపల్ కమిషనర్ టి.ఎల్.ఎస్.ఎస్. కృష్ణవేణి, కౌన్సిలర్లు, బీజేపీ, జనసేన, తెలుగుదేశం కూటమి నాయకులు, మీడియా ప్రతినిధులు కోట రామ ప్రసాద్‌ను అభినందించారు.

సత్కారంతో కళాకారునికి మరింత గౌరవం

గేయ రచయిత కోట రామ ప్రసాద్‌ను మంత్రి కందుల దుర్గేష్ దుశ్శాలువాతో సత్కరించారు. తన గేయాన్ని ఆదరించి, ప్రోత్సహించి, ఘనంగా ఆవిష్కరించినందుకు మంత్రి దుర్గేష్ గారికి, పురంధేశ్వరి గారికి ఆయన హృదయపూర్వక కృతజ్ఞతలు తెలిపారు. అలాగే కార్యక్రమం కోసం సహకరించిన మున్సిపల్ చైర్మన్, వైస్ చైర్మన్, కమిషనర్, కౌన్సిలర్లు, రాజకీయ నాయకులు మరియు మీడియా మిత్రులందరికీ ఆయన ధన్యవాదాలు తెలియజేశారు.