రోడ్డు ప్రమాదంలో దంపతులు మృతి

లక్షట్టిపేటలో విషాదం..

లక్షట్టిపేట పట్టణంలో మంగళవారం తీవ్ర విషాదం నెలకొంది. పట్టణంలో సత్యనారాయణ జనరల్ స్టోర్ నిర్వహిస్తూ ప్రజలకు సుపరిచితులైన పాలకుర్తి సత్యనారాయణ (63), ఆయన భార్య రమ (59) రోడ్డు ప్రమాదంలో దంపతులు మృతిచెందడం స్థానికులను కలచివేసింది. ఈ దుర్ఘటనతో లక్షట్టిపేట పట్టణమంతా విషాదఛాయలు అలుముకున్నాయి.

వివరాల్లోకి వెళితే, ఈ నెల 8వ తేదీన పాలకుర్తి సత్యనారాయణ, రమ దంపతులు అయ్యప్ప మాల ధరించి శబరిమలై దర్శనానికి వెళ్లారు. ప్రైవేట్ సర్వీస్ ద్వారా అయ్యప్ప స్వామి దర్శనానికి బయలుదేరిన ఈ దంపతులు భక్తిశ్రద్ధలతో మాల దీక్షను పూర్తి చేశారు. మకర సంక్రాంతి అయిన 15వ తేదీన అయ్యప్ప స్వామిని దర్శించుకొని తిరుగు ప్రయాణంలో ఉన్నారు.

తిరుగు ప్రయాణంలో భాగంగా ప్రైవేట్ టూరిస్ట్ వాహనం కన్యాకుమారి వద్ద బైపాస్ రోడ్డుపై నిలిపివేశారు. ఇతర అయ్యప్ప స్వాముల కోసం సుమారు రెండు గంటలపాటు వాహనం అక్కడే నిలిచినట్లు సమాచారం. ఆ సమయంలో సత్యనారాయణ, రమ దంపతులు సముద్ర స్నానం చేసి, అక్కడున్న ప్రసిద్ధ దేవాలయాలను సందర్శించారు.

దర్శనాలు పూర్తిచేసుకుని తిరిగి టూరిస్ట్ వాహనం

దర్శనాలు పూర్తిచేసుకుని తిరిగి టూరిస్ట్ వాహనం నిలిపిన ప్రాంతానికి చేరుకునే క్రమంలో రోడ్డు దాటుతుండగా వేగంగా వచ్చిన ఓ వాహనం వారిని ఢీకొట్టింది. ఈ ప్రమాదంలో తీవ్రంగా గాయపడిన దంపతులు అక్కడికక్కడే ప్రాణాలు కోల్పోయారు. ప్రమాదం జరిగిన వెంటనే స్థానికులు, ఇతర భక్తులు సంఘటనా స్థలానికి చేరుకుని సహాయం చేసేందుకు ప్రయత్నించినప్పటికీ అప్పటికే వారు మృతి చెందినట్లు తెలిసింది.

సమాచారం అందుకున్న పోలీసులు వెంటనే సంఘటనా స్థలానికి చేరుకుని మృతదేహాలను కన్యాకుమారి ప్రభుత్వాసుపత్రికి తరలించారు. ఈ ఘటనపై కేసు నమోదు చేసుకుని దర్యాప్తు చేపట్టారు. ప్రమాదానికి గల కారణాలపై విచారణ కొనసాగుతోంది.

సత్యనారాయణ, రమ దంపతుల మృతితో లక్షట్టిపేట పట్టణంలో విషాద వాతావరణం నెలకొంది. వ్యాపారిగా, మంచితనంతో అందరికీ చేరువగా ఉండే సత్యనారాయణ దంపతులు ఇలా అకస్మాత్తుగా మృతి చెందడం స్థానిక వ్యాపారులు, స్నేహితులు, బంధువులను తీవ్రంగా కలచివేసింది. వారి కుటుంబ సభ్యులు, బంధుమిత్రుల రోదనలు హృదయ విదారకంగా మారాయి.